انواع الشباب على النت

صباح الخير عليكم
يا جماعة انا النهاردة جايبالكم موضوع
وحاسة ان شباب المنتدى هيقيموا عليا الحد
لكن والله الموضوع كله هزار فى هزار يا شباب
نبدا اموضوع بقى
انواع الاولاد على النت

المرحلة الأولى : ( الي يدوبك لسه متعلم يدخل نت)

طبعا العمر يتراوح من 22 الى ما فوق ... وتلاقيه اول ما يدخل هاي ممكن
نتعرف انا فلان ومن الحته الفلانيه وتحسي ان فيه حنفيه معلومات اتفتحت
واي حاجة تقوليهاله يقولك يعني ايه مش فاهم وبعد كل كلمة يقولك اصل
انا لسه جديد في النت

والنوعية دي تنقسم
لقسمين :
1- يا اما متحمس وحط ف دماغه موضوع النت وعايز يتعلم
2- يا اما سمع من صحابه عن النت والبنات وجاي يجرب حظه

المرحلة الثانية: ( الي بيقعد على النت بس مش
كتير)
النوع ده كل كلامه انا مشغولياتي كتير ومبحبش النت والكلام ده وبعد ما
يكلم شوية يقولك ممكن نكمل كلام في التليفون انا اصلي مبدخلش النت
كتير ومليش خلق للكتابة والحاجات دي

والنوعيه دي تنقسم الى قسمين:
1- يا اما يبقى لحوح ويفضل يطلب نفس الطلب وصباح الملل
2- يا اما يبقى عنده عزة نفس وميلحش بس هيتعصب وهيقولك اعمليلي بلوك

المرحلة التالته : ( الي قاعد على النت ليل نهار)
ده بقى شرحه يطول وينقسم لعدة انواع
1- المقموص

ده بقى قاعد وحاطط ايده على زرار الزعل اي حاجة تقوليها تبقي بتقصديه
او بتقللي من شانه وبعد كام مرة كلام ممكن يقولك اديني نمرة تليفونك
ولما تعتذري هيقولك انا هحترم رغبتك وهيركبلك الوش الخشب ومن وقت
للتاني هتاخدي البلوك ف
وشك فنصيحه من اولها كده اديله بلوك وديليت

2- ابو دم خفيف
ده شلل مركز ومتعرفيش مين الي خدعه وقاله ان دمه خفيف وكل كلامه قفشات
وضحك والمفروض انك تكوني مجامله وتضحكي بس منصحكيش تيجي على اعصابك
3- المودي
دي بقة شخصية بتتنوع كل يوم على حسب المود وهتحسي انك بتكلمي واحد
عنده انفصام ف الشخصية النهاردة رزين وعاقل وبكرة لاسع وبعد يومين رخم
وبعدها كيوت وفريندلي طبعا الحكايه مش ناقصة
جنان كفايه الي الواحد فيه

4- اللزقه

والنوع ده عايز حزم ف التعامل معاه لأن كل كلامه انتي فين ؟ بتتاخري
في الرد ليه؟ انتي بتكلمي حد ؟؟ ياعم وانت مالك بتتحشر ليه ......ولو
قلتيله ثواني هيقولك ليه رايحة فين؟ متتاخريش ... ايه ده انتي لسه
مجيتيش ؟؟؟

5- الناصح
صباح الصداع مع كل جمله هتقوليها هتاخدي نصيحة وفيه عرض خاص قولي
جملتين وخدي اربع نصايح العرض مستمر حتى نفاد الكمية ........ولو على
منتدى زينا كده هتلاقيه بيقولك ليه حطيتي التوبيك ده وليه شيلتي
الصورة دي وحطيتي التانية انا انصحك انك تخليه يحصل اخواته الي فاتوا
يعني بلوك وديليت

6- الحبيب

انا فيا جاذبية وكل البنات بتعجب بيا ....... ايام ما كنت ف الكليه
كنت عامل ازمه والبنات بتتخانق عليا...... المصيبة بقى ان اي جمله
هتقوليها هيفهم ان انتي معجبه اصله مش بمزاجك هتحبيه يعني هتحبيه

7- حريقة بنات

ده بقى لو في منتدى او ميل جروب تلاقيه مركز على كل البنات ومبيعملش
اي حاجة تانية غير كده الكوميدي بقى لما يتلخبط ويعتقد ان الأسم ده
انثوي ويندمج وبعدين يطلع واحد صاحبه

8- الكداب

من اول الأسم والسن واي معلومة خدتيها كدب في كدب ومتعرفيش ليه ده بقى
انصحيه وخليه يغير اسمه على الماسنجر ويخليه مسيلمة الكداب

9- العبيط

ده هتلاقيه على طول حاطط صورته وذنب عليكي تتفرجي ويشيل الصورة دي يحط
التانية وكل شوية يفتح الكاميرا مع نفسه

10- بابا اوبح

ده ممكن يكون على النت من سنة 96 واتخرج واشتغل واتجوز وجاب عيال ولسه
قاعد يتعرف على بنات وكل ما يكلم واحدة يقنعها انه مش متجوز وبيدور
على عروسة وصباح السرحان ولو جربتي كل يوم تدخليله بايميل غير التاني
هتسمعي قصة حياته كل يوم مختلفة

اتمنى الموضوع يكون عجبكم

موضوعك جميل يا مس توتا ... بس انا ملاحظ ان كل الشباب اللي انتي اتكلمتي عنهم اتعملهم بلوك في الاخر ... ايه مفيش حد كويس خالص ؟؟؟

ههههههههههههههههههههههههههههههههههههه

موضوعك ظريف خالص ابدعتى بجد ومعلش اتاخرت عليكى فى الرد بس كنت مشغولة شوية
_________________

mawdo3 gameel

el wa7ed keda y3mel ignore l kol el boys lol!

هههههههههههههههههههههههههههههههههه موضوع جميل اكيد في شباب كويسيين بس مش قادرين يوصلو احساسهم لطرف التاني لان التلاقي شرط الانسجام اما في النت في كل واحد بيمل حتى من صاحبة بس بجد ماشاء اللة عليكي ابدعتي بالموضوع يسلم قلبك وتقبلي تحيا تي

ميرسى كتير لمروركم جميعا
بالنسبة لرد تايجر فانا عاوزة اقولك ان اكيد طبعا فى ناس كويسين لكن الغالبية مش بتخرج عن الانواع دى بصراحة
ويا سمسم ربنا يخليكى كفاية انك دايما منورة مواضيعى بردودك الجميلة
ليه يا هارتى اكيد مش للكل اكيد فى ناس كويسة
وميرسي لمرورك يا دكتور ناظم ومتابعتك للمواضيع lol!

موضوعك كتير حلو بس اكيد فى شباب كويسين وفى شباب بيكونوا زى متقولى متربى فى وسط بنات فبيكون انطوائى ولما بيسدق ان اتعرف على بنت فياكل دماغها lol!

هو اه فيه وفيه يا عوده
بس الاغلبية مش هتطلع من الانواع دى

طيب ما تيجوا كلنا نقيم بعد بصراحة وموضوعية وشجاعة ومن غير زعل وهى فكرة وهبتدى بنفسى يا ترى انتوا شايفين انا انى واحد منهم؟؟؟؟؟؟؟؟؟؟؟؟؟؟؟؟؟؟؟؟؟
انتى بيجبى الحاجات الحلوة ده منين يا توتا لو من تاْليفك يبقى احنا مش هنكون قدك